LUNATIC DREAMS

എന്റെ പപ്പനാവാ

2010-12-12T12:54:00.001+05:30

അഴുകുന്ന നഗരം

നഗരത്തിലെ നരക വഴികള്‍

വീഴുന്ന മരങ്ങള്‍ താഴുന്ന മലകള്‍

പണി തീരാത്ത വിമാനത്താവളം

പണി തുടങ്ങാത്ത തുറമുഖം

ഒരിക്കലും മരിക്കാത്ത ഹര്‍ത്താല്‍

തേയില വിളയാത്ത തേയില തോട്ടങ്ങള്‍

കായലും കടലും കയ്യെറ്റക്കാരനു

പെരുകുന്ന ഗുണ്ടകള്‍ കൂടെ കൊതുകുകളും

തമ്പാനൂരിലെ മഴവെള്ളപ്പോക്കം

ഒരിക്കലും നിലക്കാത്ത പീഡനങ്ങള്‍

ആശുപത്രികളിലെ അഴിമതി ദുരിതം

ഫയലില്‍ മരിക്കുന്ന ഐ ടി വികസനം

തകരുന്ന ഉന്നത പഠന കേന്ദ്രങ്ങള്‍

സ്ഥലമെടുപ്പിലെ സ്ഥാപിത താല്പര്യങ്ങള്‍

തരിശു കിടക്കുന്ന നെല്‍ പാടങ്ങള്‍

പഞ്ചറായ പൊതു ഗതാഗതം

എവിടെ എന്റെ സംഗീതം ....?

2010-02-11T11:10:00.002+05:30

പണ്ടൊക്കെ ഒരു നനുത്ത ഗാനത്തിന്റെ ഈരടികള്‍ എന്റെ ചുണ്ടില്‍ ഇപ്പോഴും തത്തി കളിച്ചിരുന്നു. ഉണരും മുതല്‍ ഉറങ്ങും വരെ ഉള്ളില്‍ അല വെട്ടിയിരുന്ന സംഗീതത്തിന്റെ ആ നേര്‍ത്ത ശ്രുതി എന്നോ എന്നെ വിട്ടു പിരിഞ്ഞു. ചുറ്റും നടക്കുന്ന പകിട കളിയില്‍ പെട്ട് തല പുകക്കുമ്പോള്‍ എന്നെ വിട്ടു പോയ ഒട്ടനേകം കൊച്ചു സന്തോഷങ്ങളില്‍ ഒന്ന് മാത്രം ആയിരുന്നു ഈ സംഗീതം എന്ന് വേദനയോടെ ഞാന്‍അറിയുന്നു.

എന്തിനും ഏതിനും ഉത്തരം തേടാന്‍ എന്നെ സഹായിക്കുന്ന അപ്പൂപ്പന്റെ ആത്മാവിനോടു ഞാന്‍ ഇതേപറ്റി കരഞ്ഞു പറഞ്ഞു. മുരളുന്ന ശബ്ദത്തില്‍ അദ്ദേഹം പിറുപിറുത്തു. "നിനക്ക് വേദനിക്കാന്‍ നഷ്ടസംഗീതങ്ങള്‍ എങ്കിലും ബാക്കി. ജീവിതത്തിന്റെ സംഗീതം എന്തെന്ന് പോലും അറിയാത്ത എത്ര എത്രപേര്‍ . അവരോ ?"

കണ്ണടച്ചു ഇരുട്ടാക്കി ഞാന്‍ എന്റെ പാട്ട് പെട്ടി ഉറക്കെ വെച്ച് ചരിഞ്ഞു കിടന്നു കൂര്‍ക്കം വലിച്ചു

ആര് ചത്താലും രാഷ്ട്രീയം ജീവിക്കട്ടെ ...

2009-12-21T13:51:00.003+05:30

വൈ എസ് ആറിന്റെ ആകസ്മികമായ നിര്യാണത്തിനു ശേഷം കലാപക്കൊടി ഉയര്‍ത്തിയ ജഗന്‍മകനെ ഒതുക്കാന്‍ മാഡം ടി ആര്‍ എസിനെ കൂട്ട് പിടിക്കുന്നു. ആള്‍ക്കാര്‍ ചാവുന്നു, അടി മേടിക്കുന്നു, നിരാഹാരം കിടക്കുന്നു. രാഷ്ട്രീയം കൊഴുക്കുന്നു.

കറങ്ങി തിരിഞ്ഞു, മദനി വീണ്ടും വരുന്നു. ഇത്തവണ ഭാര്യ ബസ് കത്തിച്ചു എന്ന് കേസ്. അറസ്റ്റ്ചെയ്തു രണ്ടു ദിവസം കഴിഞ്ഞില്ല. രാജ് മോഹന്‍ പെന്‍ വാണിഭത്തിനു പിടിയില്‍ . പിടിച്ചുകൊടുക്കാനും ജയ്‌ വിളിക്കാനും പി ഡി പി സജീവം. ഇനി ഉസ്താദ് വക നിരാഹാരം കൂടി കഴിയുമ്പോഅഞ്ചെട്ടെണ്ണം ചാവും. എന്നാലെന്താ രാഷ്ട്രീയം കൊഴുക്കും.

കള്ളത്തരത്തിന്റെ കൂടല്‍ മാണിക്യം ആണ് പോലും ജഡ്ജ് ദിനകരന്‍. പക്ഷെ ദളിതന്‍ ആയതുകൊണ്ടു തൊട്ടു പോകരുത് എന്ന് മായ മാഡം വിളിച്ചു പറഞ്ഞു. സോണിയ മാഡം അനുസരിക്കുന്നമട്ടാണ്. അഴിമതി കൊഴുക്കട്ടെ . കൂടെ ദളിത്‌ രാഷ്ട്രീയവും

ചിരിച്ചു പോയി കുഞ്ഞേ

2009-11-19T18:28:00.002+05:30

ടിന്റു മോന്‍ ഗണപതിയോട്

എന്നും രാവിലെ ടിന്റുമോന്‍ ശിവനെ തൊഴാന്‍ പോവും
ഒരു ദിവസം പൂജാരി ശിവനെ മാറ്റി ഗണപതിയെ വച്ചു
ടിന്റു മോന്‍ ഗണപതിയോട് : "മോനേ അപ്പനോട് പറയണം അങ്കിള്‍ വന്നിരുന്നു എന്ന്

കാര്‍ തള്ളല്‍

പെട്രോള്‍ തീര്ന്നു........
കാര്‍ തള്ളിക്കൊണ്ട് വരുന്ന ടിന്റു മോനോട്
അച്ഛന്‍ : എന്താടാ നീ കരഞ്ഞോണ്ട് കാര്‍ തള്ളി കൊണ്ടു വരുന്നതു
ടിന്റുമോന്‍ : അച്ഛനല്ലേ പറഞ്ഞതു ഒന്നും ചിരിച്ചു തള്ളി കളയരുതെന്നു

ടിന്റു മോന്‍ അമ്പലത്തില്‍

അമ്പലത്തില്‍ നിന്നും വന്ന ടിന്റുമോന്‍ അച്ഛനോട്
അമ്മയുടെ പേരില്‍ ഒരു പുഷ്പാഞ്ജലി കഴിച്ചു .
അച്ഛന്‍ : എന്റെ പേരിലോ ?
ടിന്റുമോന്‍: രാമേട്ടന്റെ കടയില്‍ നിന്നും പൊറോട്ടയും ചിക്കനും കഴിച്ചു

ടൂത്ത് പേസ്റ്റ്

ടിന്റുമോന്‍: നിങ്ങളുടെ ടൂത്ത് പേസ്റ്റില്‍ ഉപ്പുണ്ടോ

.

.
എങ്കില്‍ കുറച്ച മുളകും പുളിയും തേങ്ങയും ചേര്ത്തു ചമ്മന്തി ഉണ്ടാക്കിക്കോ

പരീക്ഷ

പരീക്ഷക്ക്‌ പേപ്പറില്‍ ഒന്നും എഴുതാത്ത ടിന്റുമോന്‍ ലാസ്റ്റ് പേജില്‍ എഴുതി

.
.
.
.
ഒറ്റ തന്തക്കു പിറന്നവന്‍ ആണേല്‍ ജയിപ്പിക്കെടാ ..........

പ്രണയം

"നഷ്ടപ്പെടാം പക്ഷെ പ്രണയിക്കാതെ ഇരിക്കരുത് "
--കമല സുരയ്യ
'
'
'
'
'

"പ്രണയിക്കാം പക്ഷെ തലയിലാവരുത് "
-ടിന്റു മോന്‍ (എല്‍ കെ ജി ലാസ്റ്റ് ബെഞ്ച്‌ )

ക്വട്ടേഷന്‍

ടീച്ചര്‍ :- ശ്രീ ക്രിഷ്ണനേ വധിക്കാന്‍ കംസന്‍ അസുരന്മാരെ നാലുപാടും അയച്ചു.....
ഇതില്‍ നിന്നും എന്തു മനസിലാക്കാം....?

ടിന്റുമോന്‍:- “ അന്നും ക്വട്ടേഷന്‍ ടീം ഉണ്ടായിരുന്നു “.......

ടിന്റു മോന്റെ സിഗരെറ്റ്‌ വലി

അച്ഛന്റെ മുന്‍പില്‍ നിന്നു സിഗരെറ്റ്‌ വലിക്കുകയായിരുന്ന ടിന്റു മോനോട് മാഷ്‌ ചോദിച്ചു : അച്ഛന്റെ മുന്‍പില്‍ നിന്നാണോടാ സിഗരെറ്റ്‌ വലിക്കുന്നത് ?
ടിന്റുമോന്‍ : അച്ഛനല്ലേ ,പെട്രോള്‍ പമ്പ്‌ ഒന്നും അല്ലല്ലോ !!

ടിന്റു മോനും മാമനും

ഗള്‍ഫില്‍ നിന്നും മാമന്‍ : നിനക്ക് എന്താ വേണ്ടത്
ടിന്റു മോന്‍ : മൊബൈല്‍ മതി മാമാ
സ്നേഹത്തോടെ മാമന്‍ : NOKIA മതിയോടാ കുട്ടാ ?
ടിന്റു മോന്‍ : നോക്കിയാ പോരെടാ പട്ടി വാങ്ങണം .

ടിന്റു മോന്‍ സ്നേഹിച്ച പെണ്ണ്

ടിന്റു മോന്‍ : ഒടുവില്‍ സ്നേഹിച്ച പെണ്ണും എന്നെ ചതിച്ചു
.

.
.
ചുമ്മാ വിളിച്ചതാ കൂടെ ഇറങ്ങി പൊന്നു

ചന്ദ്രനില്‍ വെള്ളമുണ്ടു

എഷിയാനെറ്റ്‌ ഫ്ലാഷ് ന്യൂസ് " ചന്ദ്രനില്‍ വെള്ളമുണ്ടു"
ടിന്റു മോന്‍ : " എനിക്ക് തോന്നുന്നത് ആ വെള്ളമുണ്ടു നീല്‍ ആമ്സ്ട്രോന്ഗ് ന്റെ ആണെന്ന്
പാവം ഉണക്കാന്‍ ഇട്ടിട്ടു എടുക്കാന്‍ മറന്നതാവും "

ടിന്റു മോന്റെ അപ്പൂപന്‍

അപ്പൂപന്‍ : " അയ്യോ മോനേ നിന്റെ മാഷ് വരുന്നുണ്ട് പോയി ഒളിച്ചോ "
ടിന്റുമോന്‍ : " ആദ്യം അപ്പൂപന്‍ പോയി ഒളിച്ചോ
അപ്പൂപന്‍ ചത്തെന്നു പറഞ്ഞാ ഞാന്‍ കഴിഞ്ഞ രണ്ടാഴ്ച ലീവ് എടുത്തത്‌"

ബസ്സ് ഓട്ടം

ടിന്റു മോന്‍ ബസ്സ് ഓടിച്ചു കളിക്ക്യാണ്
"ദ്ര്ര്‍ പി പി "
ശല്യം സഹിക്കതായപ്പോ അച്ഛന്‍ ബസ്സ് എടുത്തു വച്ചു .
ടിന്റു മോന്‍ വലിയ വായില്‍ കരയാന്‍ തുടങ്ങി ..കുറച്ചു കഴിഞ്ഞു അച്ഛന്‍ അത് തിരിച്ചു കൊടുത്തു ..
ടിന്റു വീണ്ടും തുടങ്ങി
"ദ്ര്ര്‍ പി പി സ്റ്റോപ്പ്‌ "
"വേഗം ഇറങ്ങ് ഒരു നായിന്റെ മോന്‍ കാരണം ഇപ്പോള്‍ തന്നെ 5 മിനിറ്റ്‌ ലേറ്റ് ആയി "

FTV

FTV കണ്ടു കൊണ്ടിരിക്കുന്നതിനിടെ കയറി വന്ന ടിന്റു മോനോട് അച്ഛന്‍
" പാവപെട്ട കുട്ടികള്‍ ആണ് മോനേ വസ്ത്രം വാങ്ങാന്‍ പോലും കാശില്ല "
ടിന്റു മോന്‍ : " ഇതിലും പാവപെട്ടവര്‍ വന്നാല്‍ വിളിക്കണേ അച്ഛാ "

മന്ത് നിവാരണം

2009-11-19T17:51:00.002+05:30

ഒരു പെട്ടി ഗുളികയുമായി ആരോഗ്യ കേരളത്തിലെ പ്രബുദ്ധരായ ഉദ്യോഗസ്ഥര്‍ മന്ത് നിവാരണത്തിന്ഇറങ്ങി. പണ്ടു എലിപ്പനി പിള്ളേരില്‍ ആണ് പ്രയോഗിച്ചതെങ്കില്‍ ഇത് മുതിര്‍ന്നവരെയും കുട്ടികളെയുംഒരു പോലെ ലക്ഷ്യമിട്ട ഒരു പരിപാടി ആണ്. കഴിച്ച ഒത്തിരി പേര്‍ തല കറങ്ങി വീഴുകയും ശര്‍ദ്ദിക്കുകയുംഒക്കെ ചെയ്തു. പതിവ് പോലെ ഇതെല്ലം പതിവാണെന്ന പതിവ് പല്ലവിയില്‍ പരിവേധനങ്ങള്‍ പൂട്ടികെട്ടി ആരോഗ്യ കേരളം മുന്നോട്ട് തന്നെ. കേള്‍ക്കാന്‍ ആരും ഇല്ല എന്നറിയാം. എന്നാലും ഇത്തരംമരുന്നുകള്‍ കുത്തി വെക്കുന്നതിനു മുന്‍പ് അതിന്റെ പരീക്ഷണ ഫലങ്ങള്‍ ഒന്ന് പരസ്യപ്പെടുതുന്നത്മനസ്സമാധാനതിനെങ്കിലും നന്നായിരിക്കും. അല്ലെങ്കില്‍ മന്ത്രിക്കു മരുന്ന് കഴിച്ചു ഉത്ഘാടനം ചെയ്യുന്നതിന്പകരം അത് അടുത്തു നിക്കുന്നവന്റെ അണ്ണാക്കിലേക്ക് തിരുകി ഉത്ഘാടനം ചെയ്യേണ്ടിവരും

2009-11-18T12:39:00.000+05:30

തരൂര്‍ - ഒരു നേര്‍ക്കാഴ്ച

കെന്നി എന്ന മഹാന് നന്ദി. മന്ത്രിയുമായി വെറും മുപ്പതു പേരുള്ള ഒരു ഒത്തു ചേരലിന് കളം ഒരുക്കിയതിനു. പുറത്തു വന്ദേ മാതര സംഘങ്ങള്‍ തന്റെ കോലം കത്തിച്ചു മുദ്രാവാക്യങ്ങള്‍ അലറി വിളിച്ചു കൊണ്ടിരുന്നപ്പോള്‍ ആരുടെയും മനം കുളിര്‍പ്പിക്കുന്ന പുഞ്ചിരിയുമായി തരൂര്‍ കടന്നു വന്നു. കരു മുരു വിവാദം മുഖ്യ ചര്‍ച്ചാ വിഷയമായ കെ പി സി സി യോഗത്തില്‍ അല്‍പ സമയം കൂടുതല്‍ ചിലവഴിക്കേണ്ടി വന്നു എന്ന ക്ഷമാപണത്തോടെ. യാതൊരു മുന്‍വിധികളും ഇല്ലാതെ ഞാന്‍ ഇതാ അങ്കത്തിനു തയ്യാര്‍ എന്ന മട്ടില്‍ ഉപവിഷ്ടനായ തരൂരിനെ, അങ്കിള്‍ എന്ന് സ്വയം പരിചയപ്പെടുത്തിയ ആള്‍ , തിരുഞ്ഞെടുപ്പിനു മുന്‍പും പിന്‍പും ഉള്ള അദ്ധേഹത്തിന്റെ വാഗ്ദാനങ്ങളെ പറ്റി സംസാരിക്കാന്‍ ക്ഷണിച്ചു . ഒപ്പം വന്ന ഖദര്‍ ധാരി, ആ വാഗ്ദാനങ്ങലുട്ടെ ലിസ്റ്റ് വാങ്ങി ഓടിച്ചു നോക്കുന്നത് കണ്ടു. കപ്പലണ്ടി പോതിയാനാണോ എന്തോ ? രണ്ടു കോടി രൂപയുടെ എം പി ഫണ്ട്‌ വിനിയോഗത്തെ പറ്റി പറയാന്‍ ആണ് മന്ത്രി ആദ്യത്തെ പത്തു മിനിറ്റ് വിനിയോഗിച്ചത്. മുഴുവന്‍ ഫണ്ടും വിനിയോഗിക്കാന്‍ ഉള്ള പ്രവര്‍ത്തന രേഖകള്‍ തയ്യാറായി കഴിഞ്ഞു എന്നും , ഓരോ പദ്ധതിക്കും അംഗീകാരം കിട്ടുന്ന മുറക്ക് അത് മാധ്യമങ്ങളില്‍ കൂടി പ്രസിദ്ധപ്പെടുത്താം എന്നും അദ്ദേഹം ഉറപ്പു തന്നു. അതൊന്നു കഴിഞ്ഞപ്പോള്‍ എന്റെ ഊഴം എത്തി.

പേര് പറഞ്ഞു പരിചയപ്പെടുത്താന്‍ മറന്ന ഞാന്‍ (അടി.. അടി..), നഗരത്തെ ഒരു മെട്രോ നഗരം ആക്കാന്‍ സഹായകമായ, തുറമുഖം, ഹൈക്കോടതി ബെഞ്ച്‌, വിദ്യാഭ്യാസ സ്ഥാപനങ്ങള്‍ എന്നിവയെ പറ്റി പറയാന്‍ ആണ് എന്റെ അവസരം വിനിയോഗിച്ചത്. കൂട്ടത്തില്‍, എം പി ഫണ്ട് വിനിയോഗത്തെ പറ്റി ഉപന്യസിക്കുന്ന മറ്റു "സാധാരണ രാഷ്ട്രീയം" അല്ല അദ്ദേഹത്തില്‍ നിന്നും ജനങ്ങള്‍ പ്രതീക്ഷിക്കുന്നത് എന്ന് ഓര്‍മിപ്പിക്കാനും ഞാന്‍ മറന്നില്ല. ഒരു രത്ന ചുരുക്കം

ഹൈക്കോടതി ബെഞ്ച്‌ - നടക്കില്ല. പറഞ്ഞത് ശെരി ആണെങ്കില്‍ , കേരളത്തിലെ രാഷ്ട്രീയ നേതൃത്വം മൊത്തത്തില്‍ അതിനു എതിരാണ്. ഭൂരിഭാഗം വക്കീലന്മാരും. അത് കൊണ്ടു ജനകീയ മുന്നേറ്റം കൊണ്ടു മാത്രമേ ഈ സ്വപ്നം സഫലം ആവൂ

തുറമുഖം - കേരള സംസ്ഥാന സര്‍കാരിന്റെ പ്രശ്നം. എന്ത് സഹായത്തിനും അദ്ദേഹം തയ്യാര്‍

വിദ്യാഭ്യാസം - മെഡിക്കല്‍ കോളേജ് ഒരു അന്താരാഷ്ട്ര പഠന കേന്ദ്രം ആയി ഉയര്‍ത്തും. നടന്നാല്‍ കൊള്ളാം

മഴ വെള്ള സംഭരണം ഉള്‍പ്പെടെ മറ്റു ചോദ്യങ്ങള്‍ക്ക് അദ്ദേഹം തന്റെ സഹായം വാഗ്ദ്ദാനം ചെയ്തു. കൂട്ടത്തില്‍ മാര്‍ക്സിസ്റ്റ്‌ പാര്‍ടിയെയും അച്ചു മാമനെയും, അഴുകി നാറിയ നമ്മുടെ സംവിധാനങ്ങളെയും പറ്റി ഒന്ന് രണ്ടു അഭിപ്രായം

ചുരുക്കി പറഞ്ഞത്, യാതൊരു എക്സിക്യുടിവ് അധികാരങ്ങളും ഇല്ലാത്ത പാവം എം പി ഞാന്‍. എനിക്കെന്തു ചെയ്യണമെങ്കിലും സംസ്ഥാന സര്‍ക്കാരിന്റെ അഴുകി നാറിയ ഈ സംവിധാനം മാറണം. ഈയുള്ളവന് ഒരൊറ്റ സംശയം, തിരഞ്ഞെടുപ്പ് സമയത്ത് ഇതൊന്നും അല്ലല്ലോ പറഞ്ഞത് ?

സമത്വം എന്നൊരാശയം ...

2009-10-30T15:38:00.004+05:30

പറയുമ്പോ വമ്പന്‍ സോഷ്യലിസ്റ്റ്‌. കയ്യിലിരുപ്പോ നേരെ കടക വിരുദ്ധവും. എന്റെ കാര്യം തന്നെ ആണ് പറഞ്ഞു വരുന്നത്. ചെറിയൊരു കെടപ്പാടവും ഒരു മാരുതി ആള്‍ട്ടോ യും ഉണ്ടെങ്കി തീരുന്ന പാര്‍പ്പിട, വാഹന പ്രശ്നങ്ങളെ നാല് പേരുള്ള നമ്മുടെ കുടുംബതിനുള്ളൂ . പക്ഷെ സമ്മതിക്കുമോ മനസ്സിലെ അത്യാഗ്രഹി. ഐഡിയ ഡ്രീം ഹോമിലെ വീടും, നമ്മുടെ മമ്മുക്കയുടെ ഓഡി കു സെവെനും ഒക്കെ സൊപ്നം കാണല്‍ ആണ് രാത്രി എന്റെ പ്രധാന പണി. പിന്നെ ഒരു വശത്തൂടെ സമത്വം പ്രസംഗിക്കലും. ഞാന്‍ ഒരു മൂരാച്ചി ആണോ എന്ന് എന്റെ ഭാര്യ വരെ ചോദിച്ചു തുടങ്ങി.

പക്ഷെ അവശനും, അടിച്ചമര്‍ത്തപ്പെട്ടവനും അടിയാനല്ലെന്നും, അധ്വാനിക്കാന്‍ തയ്യാറെങ്കില്‍ അവനും നമ്മളെ കൊണ്ടു കഴിയുന്ന മൂലധന സഹായം നല്‍കണം എന്നും ഞാന്‍ അടിയുറച്ചു വിശ്വസിക്കുന്നു. അത് ചെയ്യാനും ശ്രമിക്കുന്നു. അത് കൊണ്ട് സഖാക്കളെ,
സമത്വം എന്നൊരാശയം മരിക്കുകില്ല ഭൂമിയില്‍ ,
നമ്മുക്ക് സ്വര്‍ഗമിങ്ങു തന്നെ അന്നുമിന്നും എന്നുമേ

തരൂര്‍ മാഹാത്മ്യം

2009-10-29T15:57:00.005+05:30

തിരഞ്ഞെടുപ്പ് പ്രമാണിച്ചു നടന്ന അനവധി സല്കാരങ്ങളില്‍ ഒന്നില്‍ തെമ്മാടി ഷാജി എന്ന് വിളിക്കുന്ന ഒരു പഴയ സഖാവ് എന്നോടു തരൂരിന് വോട്ട് ചെയ്യുന്നില്ലേ എന്ന് ചോദിച്ചു. വിവരം ഉള്ളവന്‍ രാഷ്ട്രീയത്തില്‍ വരണം എന്ന് ഇടയ്ക്കിടയ്ക്ക് മുറവിളി കൂട്ടുന്ന എന്നെ ഒന്ന് ഇരുത്താനും കൂടി ആയിരിക്കണം അവന്‍ അങ്ങനെ ചോദിച്ചത്. പക്ഷെ എന്റെ ഉത്തരം ഫെയര്‍ലി സിമ്പിള്‍ ആയിരുന്നു. എന്നെക്കാളും പൊക്കവും, സൌന്ദര്യവും, വിദ്യാഭ്യാസവും, കാശും ഉള്ള ഒരുത്തനെ ഞാന്‍ വോട്ടു കൊടുത്തു ജയിപ്പിക്കാനോ ? അതിനു ഞാന്‍ ചത്ത്‌ ജീവിക്കണം.

ഇത് കാര്യങ്ങളുടെ മലയാളി വശം. മറിച്ച് ചിന്തിക്കുമ്പോള്‍ , ദന്ത ഗോപുരങ്ങളുടെ കാവല്‍ക്കാരെ ഇതാ സ്വര്‍ഗത്തില്‍ നിന്ന് നിങ്ങളുടെ ഇടയന്‍ നേരിട്ട് വരുന്നു എന്ന് പറയാനാണ് എനിക്ക് തോന്നിയത്. സുന്ദരനും, സമ്പന്നനും ആയ, കൈക്കൂലി കാലിനു ചവുട്ടി എറിയുന്ന, മധ്യ വര്‍ഗ്ഗത്തിന്റെ മിശിഹാ ഇതാജയിച്ചു വരുന്നു. ഇനി എല്ലാം സുന്ദരം സുരഭിലം.

പാറ കെട്ടുകള്‍ക്കു മുകളില്‍ നിന്ന് ഉമ്മര്‍ വിളിച്ചു പറഞ്ഞു.

"ശോഭേ, നിനക്ക് ഞാന്‍ പോര്‍ട്ട്‌ കൊണ്ടെ തരും, കോടതി കൊണ്ടെ തരും, ആന കൊണ്ടെ തരും, ചേന കൊണ്ടെ തരും"

സുന്ദരന്‍ ജയിച്ചു. വെറുതെ അങ്ങ് പാസായി എന്ന് പറഞ്ഞാ പോരാ. ഫസ്റ്റ് റാങ്കില്‍ പാസായി മന്ത്രി ആയി. ആയതും, സരസ്വതി വിളയാടി ഇരുന്ന നാവില്‍ ഗുളികന്‍ കേറി ടെന്റ് കെട്ടി. വിശുദ്ധ പശുക്കള്‍ക്ക് ജയ് വിളിച്ചു കന്നാലി ക്ലാസില്‍ യാത്ര. ട്വിട്ടരില്‍ പുക പാറുന്ന ട്വീട്ടുകള്‍ . അനന്തപുരിയില്‍ പൊടി പാറുന്ന ആഘോഷം. എല്ലാം ബഹള മയം.

മറ്റൊന്നും വേണ്ട സാര്‍ , അങ്ങ് പണ്ടു പറഞ്ഞ കാര്യങ്ങള്‍ എങ്ങനെ കൊണ്ടു വരും എന്ന് ഈയുള്ളവനെ ഒരു ലേഖനം വഴിയോ, ട്വീറ്റ്‌ വഴിയോ, ബ്ലോഗ്‌ വഴിയോ ഒന്ന് എന്‍ലൈടെന്‍ ചെയ്യുമോ. വോട്ട് ചെയ്തില്ലെങ്കിലും ഒരു വോട്ടര്‍ അല്ലെ ഞാനും. അറിയാന്‍ ആഗ്രഹം കാണില്ലേ ?

ഹിയര്‍ ആര്‍ മൈ കൊസ്ട്യന്‍സ്.

തുറമുഖം ? എപ്പോ എങ്ങനെ
കോടതി ? എപ്പോ എങ്ങനെ
കുടി വെള്ളം ? എപ്പോ എങ്ങനെ
ടെക്നോ സിറ്റി ? എപ്പോ എങ്ങനെ
വിദ്യാഭ്യാസ തലസ്ഥാനം ? എപ്പോ എങ്ങനെ
ബാര്‍സിലോന ? എപ്പോ ആവും എങ്ങനെ ആവും ?

അതോ ഇതൊക്കെ രഹസ്യം ആണോ ?

കാര്യം ഇതൊക്കെ പറഞ്ഞാലും ഈയിടെ അങ്ങയുടെ ഒരു പ്രസംഗം കേട്ടു. ഗംഭീരം.

വ്യാഴ മാന്ദ്യം

2009-07-31T16:17:00.001+05:30

ഇന്നലെ ഭാരതീയ ജ്യോതിഷ പ്രകാരം വ്യാഴം വീണ്ടും മകര രാശിയില്‍ പ്രവേശിച്ചു. ധന കാരകനായവ്യാഴത്തിന്റെ മകരത്തിലെ സ്ഥിതി വീണ്ടും ഒരു അതി രൂക്ഷമായ സാമ്പത്തിക മാന്ദ്യത്തിലേക്ക് നമ്മെനയിച്ചേക്കും. ഇത് ഒക്ടോബര്‍ മാന്ദ്യം എന്ന പേരില്‍ കാലാന്തരങ്ങളോളം അറിയപ്പെടും

നോസ്റെര്‍ ഡാ കുട്ടപ്പന്‍

മുപ്പത്തഞ്ചു വര്‍ഷത്തെ സര്‍വീസ്‌

2009-07-20T13:07:00.005+05:30

1974. ജനനം
1977. എല്‍ കെ ജി അഡ്മിഷന്‍ - Holy Angels High School, Adoor
1978. ആദ്യ പ്രസംഗം
1979. ഒന്നാം ക്ലാസ്സ്
1981. അനിയന്റെ ജനനം - അരവിന്ദ്
1984. ആദ്യത്തെ ശബരി മല കയറ്റം
1985- 1987. കള്ളത്തരങ്ങളുടെ നീണ്ട പരമ്പര - ജീവിതത്തിലെ ഏറ്റവും മോശം സമയം
1987. മനസ്സില്‍ മൊട്ടിട്ട ആദ്യ പ്രണയം
1989. ഒരു മാസത്തെ സംഗീത പഠനം
1989. എസ് എസ് എല്‍ സി പാസ്‌
1989- 1991. പ്ലസ്‌ ടു പഠനവും പാസ്സും , St Thomas Residential School, തിരുവനന്തപുരം
1991. എഞ്ചിനീയറിംഗ് അഡ്മിഷന്‍ TKM College of Engineering, കൊല്ലം
1991. ചീട്ടു കളി പഠിച്ചു
1992. ആദ്യമായി ഒരു പരീക്ഷ തോറ്റു - Engineering Mechanics
1992. കേരള യാത്ര
1992. പുകവലിക്കു തുടക്കം
1993. തെക്കേ ഇന്ത്യന്‍ പര്യടനം - Bangalore, Mysore, Ootty
1993. കുടജാദ്രിയില്‍ കുടി കൊണ്ടു - പന്ത്രണ്ടു കിലോ മീറ്റര്‍ മല കയറ്റം. ആദ്യമായി മദ്യം രുചിച്ചു
1993. കീച്ച്, റമ്മി, അമ്പത്താറു , മൂവായിരം, ഇരുപത്തെട്ടു, കഴുത - ചീട്ടു കളിയില്‍ പ്രാവീണ്യം
1994. SFI ഇലക്ഷന്‍ പ്രചരണം. വലത്ത് നിന്നും ഇടത്തേക്ക് ഉള്ള വലിയ മാറ്റം
1995. അഖിലേന്ത്യാ പര്യടനം - Madras, Shimla, Delhi, Agra, Goa, Malpe, Punjab
1993. താജ് മഹലും, ഷിംലയിലെ മഞ്ഞും, ജലന്ധറിലെ പേടിപ്പെടുത്തുന്ന സായാഹ്നവും
1995. ബിരുദ ധാരി
1995. മഞ്ഞ പിത്തവും ചിക്കന്‍ പോക്സും - രോഗാരിഷ്ടതകളുടെ കാലം
1996. ആദ്യത്തെ ജോലിയും ശമ്പളവും - Wipro GE Medical Systems
1996- 1997. ബെങ്കലുരുവില്‍ താമസം. എയര്‍പോര്‍ട്ട് റോഡിലെ സന്തോഷം നിറഞ്ഞ ദിനങ്ങള്‍
1996. രണ്ടു ദിവസത്തെ വയലിന്‍ പഠനം
1996. ആദ്യ വിമാന യാത്ര - Jet Airways to Delhi
1996. ആദ്യ വിദേശ യാത്ര. Milwauke, Wisconsin
1997. ഹൊഗനെക്കലിലെക്കു ഒരു യാത്ര. വട്ട വള്ളത്തിലെ മറക്കാനാവാത്ത സവാരി
1997. അമേരികന്‍ ഐക്യ നാടുകളില്‍ ആദ്യ ജോലി - Connectus
1997. നയാഗ്ര ദേവിയെ തൊഴുതു, ഷേനണ്ടോവയിലെ വസന്തം, വാഷിംഗ്‌ടണ്‍ ഡി സി, ന്യൂയോര്‍ക്ക്‌ സന്ദര്‍ശനം
1997. ആദ്യ ജപ്പാന്‍ സന്ദര്‍ശനം - NEC Japan
1998. ബോസ്ട്ടനിലേക്ക് മാറി താമസം - ജീവിതത്തിലെ നല്ല സമയം
1998. ആദ്യത്തെ ഫ്ലോറിഡ യാത്ര - ഡിസ്നി ലാന്‍ഡ്‌
1998. രണ്ടു വര്‍ഷത്തെ വിദേശ പഠനം - F W Olin Graduate School of Management
1998. ടൈം സ്ക്വയറിലെ പുതു വര്‍ഷ രാത്രി
1999. കൊര്‍ണേല്‍ സര്‍വകലാശാലയില്‍ രണ്ടു ദിവസം
1999. കര്‍മ ക്ലബ്ബിലെ നൃത്ത ചുവടുകള്‍
1999. ലാസ് വേഗസിലെ ചൂതിന്റെ രാത്രികള്‍
1999. നാഷ്വയിലെ മനോഹരമായ കൂടാരം
1999. കേപ് കോഡിലെ സുന്ദരമായ വാരാന്ത്യങ്ങള്‍
1999. ആദ്യ കാനഡ സന്ദര്‍ശനം
2000. വിവാഹിതന്‍ - ഭാര്യ സിന്ധു
2001. ആദ്യത്തെ പിരിച്ചു വിടല്‍
2001. സിന്ധുവും ഒത്തൊരു മഞ്ഞു മലയില്‍
2001. സിന്ധുവും ഒത്തൊരു ഗോവ യാത്ര
2001. ആദ്യത്തെ സ്റ്റാര്‍ട്ട്‌ അപ്പ്‌ അനുഭവം - ടെലിക്ക
2002. രണ്ടാം ഫ്ലോറിഡ യാത്ര
2002. ഫോക്സ് വുഡ്സ് ഇലെ ബ്ലാക്ക്‌ജാക്ക് ടേബിള്‍
2002. മെയിനിലെ മഞ്ഞു മലകളില്‍ ക്യാമ്പിംഗ്
2002. ആദ്യത്തെ നാടക അഭിനയം
2003. ആദ്യത്തെ കണ്മണി - മകന്‍ ദേവ നന്ദന്‍
2003. തിരിച്ചു നാട്ടിലേക്ക്
2003. കൂര്‍ഗിലേക്ക് ഒരു ഒരു യാത്ര
2004. സ്വന്തം കമ്പനി - ക്രിയേര
2004. 13 സെന്റിന് ഉടമ
2005. ബ്ലോഗിങ്ങ് തുടക്കം
2005. അഗസ്ത്യ കൂടം കയറിയ സാഹസിക യാത്ര
2005. വീട് പണിക്കു തുടക്കം
2006. ജ്യോതിഷ പഠനം
2006. ഗുട്ഗാവില്‍ ആദ്യം
2006. തേയില തോട്ടങ്ങള്‍ക്ക് നടുവില്‍ രണ്ടു ദിവസം - കുട്ടിക്കാനത്തെ കൂറ്റന്‍ ബംഗ്ലാവില്‍
2007. പുതിയ ഓഫീസിനു തുടക്കം
2008. രണ്ടാമത്തെ കുഞ്ഞു - മകള്‍ ശിവാനി
2008. സ്വന്തം വീട്
2008. പുതിയ ഓഫീസ്
2008. ആദ്യത്തെ യുറോപ്പ് യാത്ര
2008. ആദ്യത്തെ ദുബായ് യാത്ര
2009. ആദ്യമായി മുംബെയില്‍
2009. പോത്തും പുലിയും ഒത്തു ഗവിയിലെ രണ്ടു രാത്രികള്‍
2009. വര്‍ക്കല തീരത്ത് കുടുംബത്തിനൊപ്പം
2009. ജര്‍മന്‍ പഠനം -Goethe Zentrum
അനുസ്യുതം തുടരുന്ന ജീവിത യാത്ര - ഇനി എന്തൊക്കെ ആരൊക്കെ ആണോ ആവോ ?

പ്രസക്തി നഷ്ടപ്പെട്ട വി എസ്

2009-07-17T16:40:00.003+05:30

നാലഞ്ച്‌ മാസങ്ങള്‍ക്ക് മുന്‍പാണെന്നു തോന്നുന്നു, വിവര സാങ്കേതികമേഖലയിലെ പ്രശ്നങ്ങള്‍ ചര്‍ച്ച ചെയ്യാന്‍ മുഖ്യമന്ത്രി വിളിച്ചു കൂട്ടിയ യോഗത്തില്‍ പങ്കെടുക്കാന്‍ ഉള്ള ഭാഗ്യം ഈയുള്ളവന് ഉണ്ടായത്. അന്ന് വരെ മധ്യ വര്‍ഗ്ഗത്തിന്റെ മിശിഹാ എന്ന് ഞാന്‍ ഒട്ടനവധി വേദികളില്‍ പാടി പുകഴ്ത്തിയ സഖാവ് പക്ഷെ തന്റെ പിന്തിരിപ്പന്‍ പ്രസംഗം കൊണ്ടു എന്നെ തീര്‍ത്തും ഞെട്ടിച്ചു കളഞ്ഞു. മധ്യ വര്‍ഗവിഭാഗത്തിന്റെ സാമ്പത്തിക നിലവാരം വലിയ അളവില്‍ ഉയര്‍ത്താന്‍ പ്രാപ്തമായ ഒരു വ്യവസായ മേഖലയെ തികച്ചും ഒരു പറ്റം മൂരാച്ചികള്‍ എന്ന മട്ടിലാണ് അന്ന് വി എസ് അഭിസംബോധന ചെയ്തത്. പിന്നീട് പലരോടും ഇതിനെ പറ്റി സംസാരിച്ചപ്പോളൊക്കെ അദേഹത്തിന് കിട്ടുന്ന ഉപദേശത്തിന്റെ കുഴപ്പംആയി ആണ് ഇത് വ്യാഘ്യാനിക്കപ്പെട്ടത്‌.

പ്രിയപ്പെട്ട വി എസ്, അത് തന്നെ ആണ് അങ്ങയുടെ വീഴ്ചയുടെ കാരണവും. മാനേജ്‌മെന്റ് ഭാഷയില്‍ പറഞ്ഞാല്‍ അങ്ങ് ഉത്തരവാദിത്തങ്ങള്‍ മറ്റുള്ളവര്‍ക്ക് കൈമാറുകയും, പദ്ധതികളുടെ പ്രവര്‍ത്തനം ഒരു ഉപരി തലത്തില്‍ നിന്ന് നിരീക്ഷിക്കുകയും ആയിരുന്നു വേണ്ടത്. പകരം തന്റെ മുന്‍പില്‍ വരുന്നഏതൊരു പ്രശ്നത്തെയും സ്വയം പരിഹരിക്കാന്‍ ഉള്ള അമിതമായ ഉത്സാഹം അങ്ങ് കാണിച്ചു. മാധ്യമങ്ങളില്‍ കൂടി ലഭിച്ച പ്രശസ്തിയെ അങ്ങ് സ്നേഹിച്ചു തുടങ്ങി. അതങ്ങേക്ക് ഒട്ടനവധി ശത്രുക്കളെ പാര്‍ടിയിലും ഭരണത്തിലും സൃഷ്ടിച്ചു. ഉദ്യോഗസ്ഥ തലത്തില്‍ നടപ്പാക്കേണ്ടിയിരുന്ന കാര്യങ്ങള്‍ക്ക് വേണ്ടി അങ്ങ് നേരിട്ട് ഇറങ്ങി തിരിച്ചു. ഈ അശ്വമേധത്തിന്റെ ആവേശത്തില്‍ അങ്ങ് പ്രസ്ഥാനത്തെയും പാര്‍ട്ടി പ്രവര്‍ത്തകരെയും മറന്നു. മറു വശത്ത് ഒരു രണ്ടാം നിര നേതൃ നിര കെട്ടിപടുത്ത്‌ പിണറായി ശക്തി പ്രാപിച്ചു കൊണ്ടിരുന്നു.

ഇടിച്ചിട്ട കെട്ടിടങ്ങളുടെയും, ഒരിക്കലും വരാത്ത സ്മാര്‍ട്ട്‌ സിറ്റിയുടെയും, വിഭാഗീയതക്കായി ഭരണം നിശ്ചലമാക്കിയ മുഖ്യ മന്ത്രിയുടെയും പേരില്‍ ആയിരിക്കും അങ്ങിനി അറിയപ്പെടുക. രാഷ്ട്രീയത്തിന്റെ എ ബി സി ഡി അറിഞ്ഞു കൂടാത്ത ഞാന്‍ ഉള്‍പ്പെടെ ഉള്ള സാധാരണക്കാരന്റെ പിന്തുണ കുറച്ചു നാള്‍ കൂടി അങ്ങേക്ക് ലഭിച്ചേക്കാം. ആ സമയം കൊണ്ടു രാഷ്ട്രീയമായും ഭരണ പരമായും സ്വന്തം ലിസ്റ്റില്‍ ജനങ്ങള്‍ക്ക്‌ അങ്ങയെ ഓര്‍ക്കാന്‍ എന്തെങ്കിലും ഒരു മാറ്റം അങ്ങ് നടപ്പിലാക്കും എന്ന് പ്രതീക്ഷിച്ചുകൊണ്ടു .... വിധേയന്‍

ജപ്പാന്‍ ജ്വരവും പ്രതിരോധ കുത്തിവെയ്പും

2009-07-16T12:33:00.003+05:30

തിരുവനന്തപുരം ജില്ലയിലെ ഇരുപതിനായിരത്തോളം കുട്ടികള്‍ ഇന്നലെ ജപ്പാന്‍ ജ്വരത്തിനുള്ള പ്രതിരോധ കുത്തിവെയ്പിന് വിധേയരായി. ചെറിയ തല കറക്കവും ശര്‍ദ്ദിയും തൊലി പുറത്തുള്ള ചുവപ്പുകളും ഒഴിച്ചാല്‍ മറ്റു പ്രശ്നങ്ങള്‍ ഒന്നും പാര്‍ശ്വ ഫലങ്ങള്‍ ആയി ഇല്ല എന്നും "ദി ഹിന്ദു" റിപ്പോര്‍ട്ട്‌ ചെയ്തു. എന്നാല്‍ ആരുടെ ഉത്തരവാദിത്വത്തില്‍ ആണ് ഈ പരിപാടി സംഗടിക്കപ്പെട്ടത്‌ എന്നോ, ഏതു മരുന്ന് കമ്പനി ആണ് ഈ വാക്സിന്‍ നിര്‍മ്മിക്കുന്നത് എന്നോ പത്ര കുറിപ്പ് വ്യക്തം ആക്കുന്നില്ല. ഈ കുത്തിവെയ്പിന് എന്തെകിലും ദീര്‍ഘ കാല പരിണിത ഫലങ്ങള്‍ ഉണ്ടോ എന്നും പത്ര കുറിപ്പ് വ്യക്തം ആക്കുന്നില്ല. ഒരു പരീക്ഷണ അടിസ്ഥാനത്തില്‍ ആണ് ഈ കുത്തി വെയ്പ് നടത്തുന്നതെങ്കില്‍ കുട്ടികളില്‍ ഉള്ള ആരോഗ്യ പരീക്ഷണങ്ങള്‍ പാലിക്കേണ്ട മിനിമം മര്യാദകള്‍ സംഘാടകര്‍ പാലിക്കുന്നുണ്ടോ എന്നറിയാന്‍ എനിക്ക് അഗാധമായ ആഗ്രഹം ഉണ്ട്. പ്രത്യേകിച്ചും എ ഇ ഓ മാര്‍ വഴി വിദ്യാഭ്യാസ വകുപ്പ് ഈ കുത്തി വെയ്പ്പില്‍പങ്കെടുക്കണം എന്ന് സ്കൂളുകള്‍ക്ക് കര്‍ശന നിര്‍ദേശം നല്‍കുക കൂടിയാണെങ്കില്‍ .

സംസ്ഥാന വ്യാപകമായി മരുന്നുകളുടെ സുരക്ഷയും അവയുടെ പ്രവര്‍ത്തന ക്ഷമതയും ഉറപ്പുവരുത്തേണ്ട ഒരു ഏജന്‍സിയുടെ ആവശ്യകത ഈ ഘട്ടത്തില്‍ പ്രത്യേകം പ്രസക്തം ആകുന്നു.

ജപ്പാന്‍ പ്രതിരോധ കുത്തി വെയ്പ്പ്

2009-07-15T16:28:00.000+05:30

കുട്ടികള്‍ക്ക് നാളെ ജപ്പാന്‍ ജ്വര പ്രതിരോധ കുത്തി വെയ്പ്പ് ആരംഭിക്കുക ആണ്. ചിന്തിക്കേണ്ട ഒരൊറ്റ കാര്യം. ഈ വാക്സിന്‍ എവിടെ എങ്കിലും പരീക്ഷണം നടത്തിയോ ? എങ്കില്‍ അതിന്റെ തെളിവുകള്‍ എവിടെ ? അതോ ആദ്യം ആയി നമ്മുടെ കുട്ടികളില്‍ ആണോ ഇത് പരീക്ഷിച്ചു നോക്കുന്നത് ? രണ്ടു കുഞ്ഞുങ്ങള്‍ ഉള്ള എനിക്ക് ചോദിയ്ക്കാന്‍ അവകാശം ഉണ്ടെന്നു വിശ്വാസം

കടല്‍ നികത്തി വികസനം

2009-07-15T16:23:00.002+05:30

കുത്തി പൊളിച്ച റോഡുകള്‍ ഇവിടെ മരണ കുഴികള്‍ ആയി മാറിയിരിക്കുന്നു. വരുമെന്ന് പറഞ്ഞ ടെക്നോ സിറ്റിയും, ബയോ ടെക് പാര്‍ക്കും, തുറമുഖവും, നാല് വരി പാതയും എല്ലാം തലസ്ഥാനത്തിന്റെ പെക്കോലങ്ങളായി ജനത്തിനെ കൊഞ്ഞനം കുത്തുന്നു. വികസനത്തിന്‌ സ്ഥലം വേണോ ? വിഴിഞ്ഞം ഭാഗത്ത് വമ്പന്മാര്‍ കയ്യേറിയ നൂറു കണക്കിനു ഏക്കര്‍ റിസോര്‍ട്ട് കെടക്കുന്നു ? ഏറ്റെടുക്കാന്‍ ധൈര്യം കാണുമോ ? അതിനു പകരം ഇനി ഉടനെ കടല്‍ നികത്തി അതില്‍ നിന്ന് കാശു കക്കാഞ്ഞിട്ടു ഒരു സമാധാനവും ഇല്ല കിന്ഫ്രാക്ക്

ഇടതു ബദലും പ്രായോഗികതയും

2009-07-15T16:08:00.002+05:30

മൂല ധനം ഒരു പറ്റം ആള്‍ക്കാരുടെ കുത്തക ആയിരുന്ന വിക്ടോറിയന്‍ കാലഘട്ടത്തില്‍ ആണ് മാര്‍ക്സ് പ്രോലെട്ടെര്യന്‍ എന്ന പദം ഉപയോഗിച്ചത്. എത്രയൊക്കെ കഷ്ടപ്പെട്ടാലും ഒരു വ്യവസായം തുടങ്ങാനും അത് വിജയം ആക്കി തീര്‍ക്കാനും ഉള്ള മൂല ധനം അന്ന് മധ്യ വര്‍ഗ വിഭാഗങ്ങള്‍ക്ക് ഇല്ലായിരുന്നു. ഇന്നിപ്പോ സ്ഥിതി വളരെ വ്യത്യസ്തം. കോളേജില്‍ നിന്ന് പഠിച്ചു ഇറങ്ങി പിറ്റേന്ന് പിള്ളേര്‍ പുതിയ വ്യവസായങ്ങള്‍ തുടങ്ങുന്നു. അതിനു ധന കാര്യ സ്ഥാപനങ്ങളും സര്‍കാരും എല്ലാ വിധ സഹായ സഹകരണങ്ങളും ചെയ്തു കൊടുക്കുന്നു. അത് കൊണ്ടു സ്റ്റേറ്റ് കൂടാതെ മറ്റു തൊഴില്‍ ദാതാക്കള്‍ ഇന്ന് വിപണിയില്‍ സമൃദ്ധം. ഈ തൊഴില്‍ ദാതാക്കള്‍ തമ്മില്‍ മെച്ചപ്പെട്ട തൊഴിലാളികള്‍ക്ക്‌ വേണ്ടി ആരോഗ്യകരമായ ഒരു മത്സരം കുടി നിലവില്‍ വന്നപ്പോള്‍ തൊഴിലാളികളുടെ അവകാശങ്ങളും ഒരു പരിധി വരെ സുഭദ്രം. ചുരുക്കത്തില്‍ ഇന്നത്തെ സാമൂഹ്യ വ്യവസ്ഥയില്‍ ഒരു വ്യവസായം തുടങ്ങാന്‍ വളരെ എളുപ്പം എന്ന് മാത്രമല്ല മൂലധന സമാഹരണം ഇന്ന് ഒരു വലിയ വിഷയമേ അല്ല.

അപ്പൊ എവിടെയാണ് മാര്‍ക്സിസത്തിന്റെ പ്രസക്തി ? മെച്ചപ്പെട്ട ഒരു ഇടതു ബദല്‍ ഈ സാഹചര്യത്തില്‍ ഉരുത്തിരിഞ്ഞു വരേണ്ടിയിരിക്കുന്നു. നാം നിര്‍മിക്കുന്ന ഏതൊരു ചവറു ഉല്‍പ്പന്നത്തിനും മാര്‍ക്കറ്റിംഗ് എന്ന മധുര മനോഹരമായ മായാജാലം കൊണ്ടു നാം ഒരു വിപണി സൃഷ്ടിക്കുന്നു. അതെത്ര വില കൂടിയ ഉല്പന്നം ആയാലും അത് വാങ്ങാനുള്ള ശേഷി നാം സമൂഹത്തിനു കട അടിസ്ഥാനത്തില്‍ നേടി കൊടുക്കുന്നു. ആള്‍ക്കാര്‍ ഉലപ്പന്നങ്ങള്‍ വാരി കൂട്ടുന്നു. അതിനു സമാന്തരമായി അവശ്യ സാധനങ്ങളുടെ വില കൂടുന്നത് ആരും ശ്രദ്ധിക്കാതെ ആവുന്നു. ഒരു ദിവസം രാവിലെ വരുമാനത്തില്‍ ഒരു നേരിയ വ്യതിയാനം വന്നാല്‍ പോലും ലൈഫ് സ്റ്റൈല്‍ നില നിര്‍ത്താന്‍ ജനം പെടാ പാടു പെടുന്നു.

അവിടെ ആണ് ഇടതു പക്ഷ ബദലിന്റെ പ്രസക്തി. (തുടരും.. )

നഗരത്തിലെ നരക വഴിയില്‍ ഒരു മരുപ്പച്ച

2009-07-10T17:03:00.003+05:30

ജപ്പാന്‍ കുടി വെള്ള പദ്ധതിക്ക് വേണ്ടി കുഴിച്ച റോഡുകള്‍ ഉടന്‍ നന്നാക്കാന്‍ അഡീ. ചീഫ്‌ സെക്രട്ടറി ശ്രീ കെ ജയകുമാര്‍ നിര്‍ദേശിച്ചു. സുരക്ഷാ ബോര്‍ഡ്‌ മുന്നറിയിപ്പ്, പണി തുടങ്ങുന്നതും തീരുന്നതുമായ തീയതികള്‍ , കരാറുകാരന്റെ ഫോണ്‍ നമ്പര്‍ ഇവ പ്രദര്‍ശിപ്പിക്കാനും അവ സ്ക്വാഡിനെ വെച്ച് പരിശോധിക്കാനും അദ്ദേഹം നിര്‍ദേശിച്ചു. റോഡുകള്‍ ചല്ലി നിറച്ചു ഉടന്‍ സഞ്ചാര യോഗ്യം ആക്കാനും ഉത്തരവ്. ഇന്ന് രാവിലെ ഓഫീസില്‍ വന്ന വഴി തന്നെ എന്തായാലും പണി തുടങ്ങി.

ഇച്ചാ ശക്തി ഉള്ള ഒരൊറ്റ ഉദ്യോഗസ്ഥന്‍ വരുത്തുന്ന മാറ്റമേ ? ആദ്യം ശബരി മല. ഇപ്പൊ അനന്തപുരി. അദേഹത്തിന് ദീര്‍ഘായുസ്സ് കൊടുക്കണേ എന്റെ ഗുരുവായൂര്‍ പഫ്‌ ഡാഡീ

പ്രശ്നങ്ങളും പരിഹാരങ്ങളും - ഭാഗം ഒന്ന്

2009-07-09T16:25:00.005+05:30

ജാതി ചിന്തകള്‍ കൊണ്ടു മലിനപ്പെട്ട എന്റെ കഴിഞ്ഞ കു റിപ്പിനെ വിനോദ് (കാക്ക) നഖ ശിഖാന്തം എതിര്‍ത്തു എന്ന് മാത്രമല്ല പ്രശ്നങ്ങള്‍ കുറിച്ചിട്ടു പരിഹാരങ്ങളിലേക്ക് നീങ്ങാനുള്ള മലയാളിയുടെ പ്രായോഗിക പിടിപ്പു കേടിനെ കണക്കിന് വിമര്‍ശിക്കുകയും ചെയ്തു . ഉമ്മന്‍ ചാണ്ടിയും എ കെ ആന്റണിയും തലസ്ഥാനത്തിനു പുതിയൊരു ജീവ ശ്വാസം നല്‍കിയില്ല എന്നുറക്കെ പറഞ്ഞു കൊണ്ടു (ഉദാഹരണങ്ങള്‍ മറ്റൊരു ബ്ലോഗില്‍ നിരത്താം) പ്രശ്നങ്ങളും പരിഹാരങ്ങളും എന്ന ഈ പുതിയ കുറിപ്പ് തുടങ്ങാം. ഒരു തുടക്കം എന്ന നിലക്ക് പ്രശ്നങ്ങള്‍ കുറിച്ചിടുക മാത്രം ചെയ്യട്ടെ

അഴുകുന്ന നഗരം
നഗരത്തിലെ നരക വഴികള്‍
വീഴുന്ന മരങ്ങള്‍ താഴുന്ന മലകള്‍
പണി തീരാത്ത വിമാനത്താവളം
പണി തുടങ്ങാത്ത തുറമുഖം
ഒരിക്കലും മരിക്കാത്ത ഹര്‍ത്താല്‍
തേയില വിളയാത്ത തേയില തോട്ടങ്ങള്‍
കായലും കടലും കയ്യെറ്റക്കാരനു
പെരുകുന്ന ഗുണ്ടകള്‍ കൂടെ കൊതുകുകളും
തമ്പാനൂരിലെ മഴവെള്ളപ്പോക്കം
ഒരിക്കലും നിലക്കാത്ത പീഡനങ്ങള്‍
ആശുപത്രികളിലെ അഴിമതി ദുരിതം
ഫയലില്‍ മരിക്കുന്ന ഐ ടി വികസനം
തകരുന്ന ഉന്നത പഠന കേന്ദ്രങ്ങള്‍
സ്ഥലമെടുപ്പിലെ സ്ഥാപിത താല്പര്യങ്ങള്‍
തരിശു കിടക്കുന്ന നെല്‍ പാടങ്ങള്‍
പഞ്ചറായ പൊതു ഗതാഗതം

ഒരു കാര്യത്തില്‍ ഞാന്‍ വിനോദിനോട്‌ പൂര്‍ണമായും യോജിക്കുന്നു. ഇതും ഇതിലധികവും പ്രശ്നങ്ങള്‍ നഗരവാസികള്‍ അലമുറയിട്ടു പറഞ്ഞിട്ടും കാലാ കാലങ്ങളില്‍ വന്ന സര്‍ക്കാരുകള്‍ സമയബന്ധിതമായി അതില്‍ ഒന്ന് പോലും പരിഹരിക്കാന്‍ ശ്രമിച്ചില്ല എന്നത് ഖേദകരമാണ്. അത് കൊണ്ടുണ്ടായ "അവസര നഷ്ടം - lost opportunity cost" ആരും മനസ്സിലാക്കുന്നില്ല എന്നത് ഈ നാടിന്റെ മറ്റൊരു ശാപം.

നഗരത്തിനു വേണം ഒരു മിശിഹാ

2009-07-02T13:21:00.015+05:30

ഒരു നീണ്ട വിദേശ വാസത്തിനു ശേഷം തിരിച്ചെത്തി തമ്പടിക്കാന്‍ തിരുവനന്തപുരം തന്നെ പറ്റിയ സ്ഥലം എന്ന് തീരുമാനിക്കാന്‍ അന്നൊരു ഞൊടിയിട പോലും വേണ്ടി വന്നില്ല. വളരെ ചെറുപ്പത്തിലെ തന്നെ ഈ നഗരത്തെ ഞാന്‍ അത്രയധികം സ്നേഹിച്ചു പോയിരുന്നു.

അന്ന് രണ്ടായിരത്തി മൂന്നാം ആണ്ടു. കഴിഞ്ഞ ആറു കൊല്ലം കൊണ്ടു ഈ നഗരത്തില്‍ എന്താണ് പുതുമകള്‍ എന്ന് ചോദിക്കുന്ന പ്രവാസി സുഹൃത്തുക്കളുടെ മുന്നില്‍ പകച്ചു നില്‍ക്കാനേ ഞങ്ങള്‍ക്ക് ഇത് വരെ കഴിഞ്ഞിട്ടുള്ളൂ. ഏറ്റവും അവസാനം മനോരമ നടത്തിയ തലസ്ഥാന വികസന സെമിനാര്‍ ഉള്‍പ്പെടെ ഒട്ടനവധി വേദികളില്‍ ഈ പ്രശ്നം ചര്‍ച്ച ചെയ്യപ്പെട്ടു. സുന്ദരനും പ്രസസ്തനുമായ ഒരു എം പി യെയും നമ്മള്‍ തിരഞ്ഞെടുത്തു. ഇപ്പോഴും നേട്ടങ്ങളുടെ പട്ടിക ഒഴിഞ്ഞു തന്നെ കിടക്കുന്നു.

ഉത്തരം മുട്ടുമ്പോള്‍ കൊഞ്ഞനം കാട്ടുന്നതിന് പകരം ഞാന്‍ ചെയ്യുന്ന ഒരു കലാ പരിപാടിയാണ് പാളയം രക്ത സാക്ഷി മണ്ഡപത്തില്‍ ചെന്ന് നിന്ന് പള്ളിക്ക് മുകളില്‍ നില്‍ക്കുന്ന യേശു മഹാശയനെ തുറിച്ചു നോക്കുക എന്നത്. എന്തോ, അപാരമായ ഒരു അനുഗ്രഹ തേജസ്സുണ്ട് ആ വിഗ്രഹത്തിനു. എല്ലാ കൊള്ളരുതയ്മകളെയും കണ്ടിട്ടും സഹിച്ചിട്ടും നഗരത്തെ പൂര്‍ണ മനസ്സോടെ അനുഗ്രഹിക്കുന്ന മൂര്‍ത്തിമദ്ഭാവം. ഇന്നലെയും പതിവ് പോലെ ഞാന്‍ അദ്ദേഹത്തെ തുറിച്ചു നോക്കി. അങ്ങനെ നിന്ന് സമയം പാതിരാവായി കാണും. അപ്പൊ കുതിരവട്ടം പപ്പു ഏയ്‌ ഓട്ടോയില്‍ പറഞ്ഞ പോലെ പടച്ചോന്‍ കൈ കൂട്ടി കെട്ടി താഴെ ഇറങ്ങി വന്നു. കിട്ടിയ തക്കം പാഴാക്കാതെ ഞാന്‍ ചോദിച്ചു.

"നിങ്ങള്‍ മൂന്നു പേരും മുഖത്തോടു മുഖം നോക്കി ഇങ്ങനെ ഇരുന്നിട്ടും എന്തരോ ഇവിടെ വെകസനം മോരടിച്ചു പോയത്"

പിന്നീട് നടന്നത് എനിക്ക് പോലും വിശ്വസിക്കാന്‍ മേലാഞ്ഞ ഒരു സംഭാഷണം ആണ്

യേ: ഞാന്‍ ഇങ്ങനെ ഇരിക്കുന്നു എന്നെ ഉള്ളു. പക്ഷെ വേറെ കാശുള്ള യേശുമാരെല്ലാം കോട്ടയംകൊച്ചി ഭാഗത്താണ് താമസം. മാമ്മന്‍ മത്തായിയെ പറ്റി കേട്ടിട്ടില്ലേ കുഞ്ഞാടെ

ഞാന്‍ : എന്നാലും എന്റെ യേശു മഹാശയ ഇവിടെയും ഉണ്ടല്ലോ കുരിശണിഞ്ഞ കടാലിന്റെ മക്കള്‍ . അവര്‍ക്കൊരു പോര്‍ട്ട്‌ പണിഞ്ഞു കൊടുക്കരുതോ ? പിന്നെ കേശവദാസപുരം മുതല്‍ അങ്ങ്നാലാഞ്ചിറ വരെ ഉള്ള മറ്റു കുഞ്ഞാടുകളും

യേ: അവര്‍ക്കല്ലേ ജോസപ്പേ ഞാന്‍ ഒരു സ്വാഭാവിക തുറമുഖം സൃഷ്ടിച്ചത്. പക്ഷെ അതിന്റെ മോളില്‍ പണിയാന്‍ ഞാന്‍ ലാന്കോ കൊണ്ടപ്പള്ളി അല്ലല്ലോ

ഞാന്‍: കാര്യം നമ്മുടെ നബിയുടെയും ഗണപതിയുടെയും ബാച്ച് ആണെങ്കിലും ഞങ്ങളാല്‍ വേറെ ചിലരുടെ കാര്യവും അങ്ങയുടെ മനസ്സില്‍ കാണുമല്ലോ ? വേണമെങ്കില്‍ ഒരു കൂടു മെഴുകുതിരി ...

യേ: എന്നെ കുഴപ്പിക്കല്ലേ മോനെ. സഭയും പട്ടക്കാരും കൂടി ഇപ്പൊ വെറുതെ നില്‍ക്കുന്ന എന്നെ കുരിശില്‍ തറച്ചു നിര്‍ത്തും. ഒന്നുമില്ലെങ്കിലും നീ എന്നെ വല്ലപ്പോഴും വന്നു കാണുന്നവന്‍ അല്ലെ. ആ സ്നേഹം കൊണ്ടു പറയുവാ.. കൊച്ചീല്‍ പത്തു സെന്റ്‌ സ്ഥലം വാങ്ങിക്ക് ..
വാല്‍ കഷ്ണം : ഒരു വി കെ എന്‍ അല്ലാത്തത് കൊണ്ടു എഴുതി കഴിഞ്ഞപ്പോ ഒരു സുഖം തോന്നുന്നില്ല. പക്ഷെ പറയാനുള്ളത് പറയാതെ വയ്യ. അനന്തപുരിയുടെ ഭൂമി ശാസ്ത്രത്തില്‍ ഒരു സമ്പന്ന ക്രിസ്തീയമേധാവിത്വം ഇല്ലാത്തതു കൊണ്ടാണോ ഒന്നിന് പുറകെ ഒന്നായി ഇവിടെ വരുന്ന പദ്ധതികള്‍ തല്ലികെടുത്തുന്നത് ? അല്ലെങ്കില്‍ വിദ്യാഭ്യാസ പരമായി ഇത്രയും മുന്നോക്കം നില്‍ക്കുന്ന ഒരു നാട് വികസനത്തില്‍ മാത്രം പുറകിലായി പോകാന്‍ കാര്യം ?

ഭ്രമരം

2009-06-29T16:47:00.003+05:30

ഒരു പറ്റം ലാലേട്ടന്‍ ഫാന്‍സിന്റെ കൂടെ താഴത്തെ നിലയില്‍ ഇരുന്നു ഞാനും സിന്ധുവും ഭ്രമരം കണ്ടു. ചിത്രത്തിന് എന്തിനു ഭ്രമരം എന്ന് പേരിട്ടു എന്നത് ഇപ്പോഴും ഒരു സമസ്യ. പതിവ് പോലെ ജയ്‌ വിളികളും ശൂളം വിളികളും കൊണ്ടു മുഖരിതമായ തിയേറ്റര്‍ പക്ഷെ പെട്ടെന്ന് തന്നെ ചലച്ചിത്രത്തിന്റെ ഗൌരവം ഉള്‍ക്കൊണ്ടു നിശബ്ദം ആയി. പതിവ് മീശ ചുരുട്ടലുകള്‍ വിട്ടു കോടമ്പാക്കത്തെ നീല തെരുവില്‍ ലാലിനെ കൊണ്ടിറക്കിയ ബ്ലെസ്സി മെതേഡ്‌ കലക്കി. താര മൂല്യം തലയ്ക്കു പിടിക്കാത്ത രണ്ടാം നിര നായകന്മാരെ വെച്ച് സ്വാഭാവികത കൊണ്ട് വരാനുള്ള ബ്ലസ്സിയുടെ ശ്രമവും ഒരു പരിധി വരെ വിജയിച്ചു. തന്റെ താല്പര്യങ്ങള്‍ ആയ യോഗ, പാചകം, പെണ്‍കുട്ടികള്‍ ഇവ എല്ലാം ഒരു സംവിധായകന്റെ കരുത്തുറ്റ കൈകളില്‍ നിന്ന് മോഹന്‍ ലാല്‍ സൂക്ഷിച്ചു ഉപയോഗിച്ചു എന്നതാണ് ഈ ചലച്ചിത്രത്തിന്റെ ഏറ്റവും വലിയ പ്രത്യേകത. ഒരു ലോറി തെരുവില്‍ വെച്ച് ഉപയോഗിച്ച രണ്ടു തറ തമാശ പോലും എല്ലാവര്‍ക്കും ബോധിച്ചു. അങ്ങനെ രസം പിടിച്ചു രസം പിടിച്ചു രണ്ടാം പകുതിയുടെ രണ്ടാം പകുതി എത്തിയപ്പോള്‍ അത് വരെ ക്ലാസില്‍ ശ്രദ്ധിച്ചിരുന്ന കുട്ടി പെട്ടെന്ന് മയങ്ങിയ ഒരു അവസ്ഥ ആയി പോയി ബ്ലെസ്സിയുടെതു. അത് വരെ ഒരു ലളിത ഗാനം പോലെ പോയ പടം പെട്ടെന്ന് വായു കേറിയ അപ്പാപ്പന്റെ അവസ്ഥ പോലെ അങ്ങോട്ടും ഇങ്ങോട്ടും എല്ലാം ആടാന്‍ തുടങ്ങി. ഈ ഘട്ടത്തില്‍ പാട്ടൊന്നു പാടി തീര്‍ന്നതും മുന്‍ നിരയില്‍ നിന്നുയര്‍ന്ന "അണ്ണാറ കണ്ണാ വാ" എന്ന കാറല്‍ ഒട്ടൊന്നുമല്ല കാണികള്‍ക്ക് രസിച്ചത്. അവര്‍ അതിനെ കൈ കൊട്ടി പ്രോത്സാഹിപ്പിക്കുകയും ചെയ്തു. എന്തായാലും അവസാനത്തെ കുറെ നേരം ലാല്‍ എന്ന നടനും, ഭ്രമരത്തിന്റെ തിരക്കഥയും സംവിധായകന്റെ കയ്യില്‍നിന്നും പാടെ വഴുതി പോയി. അവസാനത്തെ വണ്ടിനെ പറപ്പിച്ച നമ്പര്‍ (പണ്ടിത് ഒരു ഇംഗ്ലീഷ്പടത്തില്‍ ഈച്ചയെ വെച്ച് ശക്തമായി ഉപയോഗിക്കപ്പെട്ടത് കൊണ്ടാണോ എന്നറിയില്ല, അല്പംഅരോചകം ആയി തോന്നി )

മനസ്സിലായത്‌ പറയട്ടെ സാര്‍ . ശക്തമായ ഒരു തിരക്കഥയുടെ ചട്ട കൂട്ടില്‍ മാത്രമേ നടന്മാരുടെ ലോകോത്തര പ്രകടനങ്ങള്‍ പുറത്തു വരൂ. അതില്‍ വരുന്ന ഒരു ചെറിയ പാളിച്ച പോലും ലാലിനെ പോലൊരു നടന്‍, സംവിധായകനെ ധിക്കരിച്ചു തന്റെ സ്വന്തം വഴി തിരഞ്ഞെടുക്കാന്‍ ഇടയാക്കും. മറ്റു ചിത്രങ്ങളില്‍ ആദ്യാവസാനം ഇത് സംഭവിക്കുമ്പോള്‍ ഇവിടെ അത് അവസാനത്തെ മുപ്പതു മിനിറ്റില്‍ സംഭവിച്ചു. ബ്ലെസ്സി ശ്രദ്ധിക്കുമല്ലോ അല്ലെ ? എന്തായാലും നൂറു രൂപ മുടക്കുന്നതില്‍ തെറ്റില്ല .

എന്റെ ഗേള്‍ ഫ്രെണ്ട്

2009-06-26T10:41:00.005+05:30

ജീവിതം തീരെ വിരസം എന്ന് തോന്നുമ്പോള്‍ സഞ്ചിയും തൂക്കി നഗരത്തിലെ നനഞ്ഞ വഴികളില്‍ കൂടി ഒരു ലക്ഷ്യവും ഇല്ലാതെ അലഞ്ഞു തിരിയുക എന്നത് എന്റെ മറ്റൊരു ഭ്രാന്തു. ഇതിനിടെ വീണു കിട്ടുന്നഒരു ചൂട് മുളക് ബജ്ജിയോ, ഡി സി ബുക്സില്‍ നിന്ന് കിട്ടുന്ന ഒരു നല്ല പുസ്തകമോ, വഴിയോരത്ത് കാണുന്ന ഒരു പഴയ സുഹൃത്തോ മതിയാവും മരവിച്ച മനസ്സിനെ ഒന്ന് തീ പിടിപ്പിക്കാന്‍. അത്തരം ഒരു ഇടവപ്പാതി ദിവസത്തില്‍ ആണ് ഞാന്‍ അഗ്നുസിനെ കണ്ടു മുട്ടുന്നത്. ഒരു അഞ്ചര അടി പൊക്കവും ഇരു നിറവും മെലിഞ്ഞു ശ്രീത്വമുള്ള മുഖവും ആഗ്നസിന്റെ ഐഡന്റിറ്റി ആയിരുന്നു. അതിലുപരി കണ്ണുകളില്‍ എന്തോ തിരയുന്ന കനലുകളും.

നഗരത്തിലെ പുതിയ പുളകങ്ങളായ റേഡിയോ ജോക്കി തിരഞ്ഞെടുപ്പിനുള്ള നീണ്ട ക്യുവില്‍ എന്റെ തൊട്ടു മുന്നില്‍ ആയിരുന്നു അവളുടെ സ്ഥാനം. ഒരു പതിനഞ്ച് വയസ്സെങ്കിലും പ്രായ വ്യത്യാസംഉണ്ടായിരുന്നിട്ടും ഞങ്ങള്‍ സംസാരിച്ചു തുടങ്ങി. നല്ല ശുദ്ധമായ മലയാളം. എവിടെയെക്കെയോ കറങ്ങിനടക്കുന്ന മനസ്സ്. ഒരു പാടു കാര്യങ്ങള്‍ ചെയ്തു തീര്‍ക്കണം എന്ന വാശി. ആര മണിക്കൂര്‍ കൊണ്ടു ഞങ്ങള്‍ ഒട്ടേറെ കാര്യങ്ങള്‍ പറഞ്ഞു. ചിരിച്ചു തര്‍ക്കിച്ചു അന്യോന്യം കളിയാക്കി. ഒടുവില്‍ ഇന്റര്‍വ്യൂ മതിയാക്കി പിരിയുമ്പോള്‍ മനസ്സില്‍ എവിടെയോ വിരഹത്തിന്റെ നീണ്ട നെടുവീര്‍പ്പ് അവള്‍ ബാക്കി നിര്‍ത്തി. അഭാസങ്ങളുടെ ഭാരം പെറാതെ വെറുതെ ചിരിക്കാനും കരയാനും കളിയാക്കാനും മനസ്സ് തുറന്നിരിക്കാനും ഒരു പെണ്‍ സുഹൃത്ത്‌ ഉണ്ടായിരുന്നെങ്കില്‍ ... അപ്പോള്‍ എന്റെ രണ്ടു കുഞ്ഞുങളെയും എന്നെയും പൊന്നു പോലെ നോക്കുകയും എനിക്ക് പുറം തടവി തരുകയും ചായയും സോപ്പും തോര്‍ത്തുംഎടുത്തു തരികയും ഓരോ ആപല്‍ ഘട്ടത്തിലും എന്റെ ഒപ്പം താങ്ങും തണലും ആയി നില്‍ക്കുന്ന എന്റെ കൂട്ടുകാരിയെ ഞാന്‍ അറിയാതെ ഓര്‍ത്തു. മനസ്സിന്റെ കഷണങ്ങളും വാരി കൂട്ടി ഞാന്‍ വീട്ടിലേക്കു വണ്ടി പിടിച്ചു.

നിയമ നിര്‍മാണവും പതിനാറു അടിയന്തര പ്രമേയങ്ങളും

2009-06-25T17:11:00.001+05:30

ഒരു ശരാ ശരി പൌരന്‍ എന്ന നിലയില്‍ നിയമ സഭയെ കുറിച്ച് എന്റെ കാഴ്ചപ്പാടു പറഞ്ഞോട്ടെ. അവിടെ നിയമങ്ങള്‍ ഉണ്ടാവണം. ആ നിയമങ്ങള്‍ ജനങ്ങളുടെ ജീവനും സ്വത്തും സംരക്ഷിക്കണം. അതിലും ഉപരിയായി ആ നിയമങ്ങള്‍ തൊഴിലവസരങ്ങള്‍ സൃഷ്ടിക്കണം. ഒരു ഉദാഹരണം പറയട്ടെ. നാട്ടില്‍ വിക്കുന്ന എല്ലാ മരുന്നുകളും, ഒരു ഏജന്‍സി വഴി രജിസ്റ്റര്‍ ചെയ്യപ്പെട്ടണം എന്നും ആ ഏജന്‍സിഅംഗീകരിച്ച മരുന്നുകള്‍ മാത്രമേ മരുന്ന് കടകള്‍ സ്റ്റോക്ക്‌ ചെയ്യാവൂ എന്ന് ഒരു നിയമം കൊണ്ട്വന്നെന്നു വെക്കുക. ആ നിയമം നടപ്പിലാകുക വഴി മരുന്നുകളിലെ കള്ളന്മാരെ നമുക്ക് തുരത്താം. ആനിയമം നടപ്പാക്കുക വഴി പത്തു തൊഴിലുകളും നമുക്ക് സൃഷ്ടിക്കാം

ഇതൊക്കെ പറയാന്‍ കാര്യം ഉണ്ട് ചാണ്ടീ. സഭ കൂടി നാല് ദിവസത്തില്‍ കാല്‍ കാശിനു പ്രയോജനംഇല്ലാത്ത അടിയന്തര പ്രമേയവും ഇറങ്ങി പോക്കും നടത്താതെ, അവിടെ അടങ്ങി ഇരുന്നു നല്ലകാലത്ത് നാല് നിയമം ഉണ്ടാക്ക് സര്‍ . അല്ലാതെ സ്വാശ്രയ നിയമം പുഴുങ്ങി ഇപ്പൊ കൊറേഡോക്ടര്മാര് കൂടി ഉണ്ടായാല്‍ ഇവിടെ തേനും പാലും ഒഴുകുമായിരിക്കും. സഹിക്കാന്‍ മേലാഞ്ഞിട്ടാ .. ക്ഷമിച്ചു കള

വിഴിഞ്ഞവും വഴിയായോ ?

2009-06-25T16:51:00.000+05:30

ലാന്‍കോ കൊണ്ടപ്പള്ളി ജീവനും കൊണ്ട് ആന്ധ്രക്ക് ഓടി. എന്തെല്ലാം ബഹളം ആയിരുന്നു ? സ്ഥലമെടുപ്പ്, സൂം, കോടതി, അമ്പു, വില്ല്, മലപ്പുറം കത്തി. എല്ലാം ഒരൊറ്റ നിമിഷം കൊണ്ട് തീര്‍ന്നു. ഇനി ഒന്നെന്നു ടെണ്ടര്‍ വിളിച്ചു പണി തുടങ്ങാം. ഇവിടെ എന്നെങ്കിലും ഒരു തുറമുഖം വരുമോ ആവോ ? തരൂര്‍ ചേട്ടനില്‍ ആണ് ഇപ്പൊ ഒരു പ്രതീക്ഷ. എന്തായാലും ഒരു വെള്ളി വെളിച്ചം പറയാതെ വയ്യ. ഇന്ന് നിയമ സഭയില്‍ പ്രതിപക്ഷവും ഭരണ പക്ഷവും സംഗതി നടക്കണം എന്ന മട്ടില്‍ തന്നെ സംസാരിച്ചു.

ഒരു കാര്യം പറഞ്ഞോട്ടെ സാര്‍ . രാഷ്ട്രീയ ഇച്ചാ ശക്തി കൊണ്ട് കാര്യങ്ങള്‍ നടക്കുമായിരുന്ന ഒരു കാലം ഈ രാജ്യത്തു നില നിന്നിരുന്നു. ഇന്നിപ്പോ ദുബായ്, തൂത്തുക്കുടി, കൊളംബോ ലോബികളോടും, ഒരു വലിയ റിസോര്‍ട്ട് ലോബിയോടും പയറ്റി വേണം കപ്പല്‍ വിഴിഞ്ഞത്ത്‌ അടുക്കാന്‍. അതിനു ഒരു വമ്പിച്ച ജനകീയ മുന്നേറ്റം കൂടി അനിവാര്യം.

സെക്യൂരിറ്റി സിമ്പോസിയം

2009-06-24T17:29:00.001+05:30

ഇന്ന് 20000 ആള്‍ക്കാര്‍ ജോലി ചെയ്യുന്ന ടെക്നോ പാര്‍ക്കില്‍ സുരക്ഷാ സാധ്യതകളെ പറ്റി ഒരു സിമ്പോസിയം നടന്നു. ഐ ജി, ഡി ജി പി, ഐ എ എസ് ഉദ്യോഗസ്തരുടെ ഒരു നീണ്ട നിര തന്നെ പ്രാസംഗികരായി എത്തിയിരുന്നു. മറ്റു ഏതൊരു ചര്‍ച്ചയും പോലെ ഇതും ക്രിയാത്മകമായ യാതൊരു നിര്‍ദേശങ്ങളും ഇല്ലാതെ കടന്നു പോയി. സീബ്ര ലൈന്‍ വഴി ക്രോസ് ചെയ്യുന്നതും വലതു വശത്ത് കൂടി നടക്കുന്നതും ഉള്‍പ്പെടെ ഒരു ഡ്രൈവിംഗ് ലൈസെന്‍സ് എടുക്കാനുള്ള ക്ലാസ്സ്‌ പോലെ തോന്നിയത് കൊണ്ടു ഒരു അര മണിക്കൂര്‍ കഴിഞ്ഞു ഞാന്‍ ഇങ്ങു ഇറങ്ങി പോന്നു. എന്നെ അറസ്റ്റ്‌ ചെയ്യുമോ എന്തോ ?

ഇസ്ലാമിക തീവ്ര വാദത്തെയും മാവൂയിസ്റുകളെയും പറ്റി ഉള്ള പരാമര്‍ശവും എന്തായാലും വേണ്ടി ഇരുന്നില്ല. ജാതി മത തീവ്ര വാദങ്ങളെ മാറ്റി നിര്‍ത്തി പണിയെടുത്തു പത്തു കാശുണ്ടാക്കി വെല്യ കച്ചറ ഇല്ലാതെ ജീവിക്കുക എന്നത് മാത്രം ആണ് യുവര്‍ ഓണര്‍ ഇവിടെ മുക്കാല്‍ പേരുടെയും ജീവിത ലക്‌ഷ്യം

സംശയം മാറുന്നില്ല സാര്‍ . രാജ്യത്തെ ഐ ടി പാര്‍ക്കുകള്‍ കേന്ദ്രീകരിച്ചു വിധ്വംസക പ്രവര്‍ത്തനങ്ങള്‍ നടക്കുന്നു എന്നോ മറ്റോ പത്രത്തില്‍ വായിച്ച ഒരോര്‍മ. അതിനെ നേരിടാന്‍ കമ്മ്യുനിട്ടി പോലീസിംഗ് മതിയാകുമോ ? അതോ ആള്‍ക്കാരുടെ വരവ് പോക്കു കര്‍ശനമായി നിരീക്ഷിക്കാന്‍ ഉള്ള നൂതന സംവിധാനങ്ങള്‍ ആയിരിക്കുമോ പോംവഴി. ആരും ഒന്നും പറഞ്ഞു കേട്ടില്ല.

അണ്ണാ ഇതെന്തൊരു നാട് ?

2009-06-22T17:21:00.003+05:30

നാടാകെ ബഹളം. പാര്‍ട്ടി പരമോന്നതന്‍ പത്രക്കാരെ ചീത്ത പറഞ്ഞും, അച്ചന്മാരെ മര്യാദ പഠിപ്പിച്ചും, ചാനലില്‍ സഖാവ് സൂഫിയയെ മാറി മാറി കാണിച്ചും, സാക്ഷാല്‍ മ അഥനിയെ താലോലിച്ചും തിരഞ്ഞെടുപ്പ് നല്ല വെടിപ്പിനും വൃത്തിക്കും തോറ്റു. തോറ്റത് മുഖ്യന്റെ പിടിപ്പു കേടാണെന്നും പറഞ്ഞു മന്ത്രിമാരെല്ലാം കൂടി കേന്ദ്ര കമ്മിറ്റിയില്‍ കൂടിയാട്ടം. ശക്തിധരന്‍ സഖാവിനെ പോലുള്ള ലോക്കല്‍ അണ്ണന്മാര്‍ വക ചാനല്‍ താണ്ഡവം വേറെയും.

അപ്പോഴാണ് ജയിച്ച കക്ഷി വക മറ്റൊരു ഡ്രില്‍ . ആദ്യം യൂത്തിന്റെ തലപ്പ് ചെത്തി. ഉമ്മച്ചന്‍ നേരെ പണ്ടെന്നോ പടമായ വിമോചന സമര പോരാളികളുടെ ഖബറിടത്തില്‍ കണ്ണ് നീര്‍ വാരി വിതറി. ഇനി ഒരു സമരം കൂടി നടത്തി പത്തെണ്ണം പടമായാലും ഇവിടെ കോട്ടൂരച്ചനെയും സിസ്റ്റര്‍ സ്റെഫിയെയും ഒക്കെ അണി നിരത്തി ഒരു രണ്ടാം സമരത്തിന്‌ തയ്യാര്‍ എന്നും ഉമ്മച്ചന്‍ ആര്‍ത്തു വിളിച്ചു. അടങ്ങുമോ ചെന്നിത്തല. നായന്മാരെ കൊണ്ടും വിളിപ്പിച്ചു നാല് തറവാടിത്തമുള്ള തെറി. സുന്ദരനും മിടുക്കനുമായ തരൂര്‍ പോലും ഡല്‍ഹി നായരെന്നു തരം താഴ്ത്തപ്പെട്ടു. സുകുമാരന്‍ നായരാണ് ഏറ്റവും നല്ല നായര്‍ എന്ന് എല്ലാവരും ശെരി വെച്ചു. ഫസല്‍ ഗഫൂര്‍ വക നായന്മാര്‍ക്കും കിട്ടി നല്ല നാലെണ്ണം . ഏറ്റവും രസകരം SNDP വക പോസ്റ്റര്‍ ആയിരുന്നു . ഈഴവരായ പിണറായി വിജയനും അച്ചു മാമനും കൊമ്പ് കോര്‍ക്കുമ്പോള്‍ നായന്മാരും നസ്രാണികളും നാലാം വേദവും എല്ലാം കൂടി ചോര കുടിക്കാന്‍ കാത്തിരിക്കുന്നു എന്ന്.

സര്‍ ഒരു ഡൌട്ട് ചോയ്ചോട്ടെ. എന്റെ വീടിനു മുന്നിലെ റോഡു നിറയെ ചവറും കുഴിയും. പിള്ളേര്‍ക്കെല്ലാം ഒരു വിറയലും പനിയും. ഭക്ഷണത്തിന് ആണെങ്കീ തീ വില. ജീവന്‍ രക്ഷാ മരുന്നുകള്‍ വാങ്ങണമെങ്കില്‍ ഉള്ള പത്തു സെന്റ്‌ എഴുതി വിക്കണം. അല്ല സമയം കിട്ടുമ്പം ഈ "ജാതി പ്രശ്നം " കൂടി ഒന്ന് കൈ വെക്കുമോ ?